ياعيون شطوط
ورموش شجر ع الضفتين
من جنبها لما بفوت
من سحرها بصحا وبموت
لسانى ملجوم بالسكوت
ياعيون هلال ساكنه الجبين
قبله صلاه العاشقين
ياشعاع ونازل م القمر خطين
ياننى عين
غازل اوردتى وشراينى مضفرهم
قلبى انفصل منى قام راح يحصلهم
عمال يغنى والغنا مش بيوصلهم
انا قلبى تعبان م الغنا
ايه الى كان جبنى هنا؟
ايه الى نزلنى انا ف بحر الهوا؟
اقرب شطوطه مننا قرب السما
لكننا رغم الضنا
نحلم بضمه الشطوط
وبعدها ندبل نموت
تضمنا خيوط عنكبوت
نسكن ف قلب الشرنقة
نلقى لهيبها محرقة
وهنعمل اية للمعشقة
ياحروف غازلها العاشقين
ورد ونبت ع الشفتين
ياننى عايم بين شطين
يالؤلؤتين ف الوش مفروطين
ياحبتين من قلبى ف عنقودين
نظره خجل تقفل عنين
نظره امل تفتح عنين
الننى فين
سحر الجمال ساكن الننى
جنى الجمال عايز يجننى
ياعيون قمر
ورموش نجوم
يا طيف سحر كل العيون
يارمش قاتل خليك حنون
قلبى الى سايب ماطرحه
عايزك تقوم تفتحه
وتفرحه
تبنيله قصره مابين رمشين
ف وسط بحرك بين الشطين