ادريك عالي وياجبل ماهزه ريح
سبحان من ارسى الارض بجبالها
يعراق اسمك بالفخر كلش جبير
يلّي مالمّك شِعِر كوّالها
الروج عالي ومركبك مرساهْ ثجيل
صرت ناعور ابخشم شلّالها
خيمتك عفّة وتسامرها النجوم
وكصّتكْ غرّه ويلالي اهلالها
منو ياعايل يمر يمهه ويحوف
الهوة مانسّم جريب احبالها
يبو سيف الماصدة بغمده ومهيب
لوتسلّة اتهاب منّة ابطالها
يبو حجي الزين ياجلمة رزان
جنها مهرة تزامط بخيالها
صبرك ابراهيم نصبو منجنيق
اولا خفت نمرود مو جفّالها
انت نطاح الفشك صخرة وعنود
ياصدر ماهاب من هيّالها
بغداد من تمشي بغنج زفة عروس
ضحكة السمرة التباهي ابخالها
حياج يابنت العرب مشيج ثجيل
زيّنت خطو المشي بخلخالها
اه ياغربة وطن همّج جبير
لو تعن الروح منهو ابحالها
حيل توجعني وانا الجرحي عتيج
بخيط اركّعها ويتيخ اذيالها
غربة مرّه ولاطعم بيها الحياة
خاف نكضي ومايصح نكّالها
من يصح ادري ترة حنّت غريب
خاف يبخل بالجفن نزّالها