جنون الليل خيم في سواده
وماتت دمعتي في وسط عيني
قلوب وسطها جهل وبلاده
تقاليد تقطّع في وتيني
بديت أنساك يا لون السعادة
ظروف فاصله بينك وبيني
بكيت ودمعتي بالعين عاده
سببها واحد من والدييني
وحزني ماخذ كل الريادة
وهمي لو نسيته ما نسيني
كبرت ولا كبرت إلا قراده
وكن الجرح واضح في جبيني
عمر خمسة عشر ما به زيادة
ولكن ضعفها حزنن يجيني
تفرعن والدي ظلم وجلاده
تقاليدٍ ماهي من شرع ديني
وزوجني لواحد من عناده
سنين واجده بينه وبيني
بياض الراس زايد عن سواده
على ضره عنيده ما تبيني
حملت وجبت مولود بسعادة
فرحت وقلت هاتي يا سنيني
يتيمة فرحتي هم ونكادة
ولكن بعدها يخطف جنيني
أخذ مني صغيري في مهاده
عطاه لضرتي قدام عيني
سكت وقلت يهنا في مراده
بكيت وقلت وش تقدر يديني
وجبت الثاني بتالي رماده
وخفت إن راح يذبحني حنيني
وشاله والده غصب بعتاده
وأنا همي بعدهم يكتسيني
حملت بمن ملت قلبي رغاده
وقلت الموت لآراحت يجيني
خطفها ماعرف معنى العبادة
وسلمها لها واقفى في عيني
بكيت وقلت وش ترجي حصاده
وتمتم مقفي في كلمتيني
أخذتك مصنع انجاب وولآده
ولكن ماحسبتك تفهميني
وسالت دمعتي فوق الوسادة
بكيت وما بكيت إلا سنيني
أنا أم أطفال بأوراق وشهاده
ولكن الأمومة ما تجيني
لو اسمع من جمانه قول داده
حكايتها ترد الروح فيني
جمانه طفلتي مابي زيادة
طلبتك يا جمانه تسمعيني
أنا امك ي منى القلب ومراده
وطيفك مارحل من وسط عيني
وما يملك خفوقي من ركادة
تحول للجنون ب لحظتيني
متى حظي يبي يسرج جواده
تعبت ولآاحد ماخذ يديني
جمانه طفلتي ما بي زيادة
طلبتك يا جمانة تسمعيني