ياذيب وش بك تالي الليل
تعوي وورقني عواك
كنك حزين وتبكي بويل
ياذيب اشقاني بكاك
ياليتها لك توصل الريل
كنت بستمع ياذيب دعواك
ترعى الثريا ونجمة سهيل
وأول قفار البيد مرعاك
عنك نوى خلك رحيل
وين اللقاء كل يوم ما ياك
مدري نوى قطع المواصيل
ولا انجبر يبعد وينساك
مدري غراه ضوء القناديل
وعاف الظلام وعيشته معاك
اعوي واندب له مراسيل
بيجاوبك لي كان يهواك
يحني عليك بروف ويميل
لا يابت الأيام ذكراك
بيهلها دموعة هماليل
يومن جفا عنك وخلاك
ياذيب حالي مثلك اعليل
اشكي فراق الخل شرواك
سهمن رماني في مجاتيل
ظبين ربض في ظلت الراك
وين البوادي غافها اظليل
هناك يالمضنون مرباك
وين الغدر ومياهها تسيل
يضحك فؤادي يوم بلقاك
فرحان ياسودا المياديل
اسعد وارضى دوم برضاك
ياريم ياللي وارد الغيل
اشرب هني ياريم من ماك
يارب نشكي قلة الحيل
عبدك وذيب البر شاكاك
يوم الملا باتوا مذاهيل
يونس فبطن الحوت ناداك
وحميت يوسف وانته اكفيل
يومن فقاع البير ناجاك
اعطف علينا بالتساهيل
رحماك رب الكون رحماك
يسقي بدية مالمطر سيل
ساري على الأوطان جدواك
سحاب وبروقه مشاعيل
يوده سقا العربان واسقاك
يالله عسى أيام المجابيل
تزين لك من زين معناك
ياذيب لا زليت بالجيل
اعفي ومن ذنبك عفيناك
طبع النشاما والرجاجيل
تسمح ويعل الرب يرعاك