شاقني شوف المزن وبرقن من القبلة يلوح
كريم يا برقن سنا لا تكون في جودك شحيح
أسقي فروعن ذابله ودارن غدا ماها ضحوح
يتلي رعدها بروقها ينهم بها الغيث ويصيح
عم وشمل روض وفلا وهضاب وجبال وسيوح
وطعس وحزومن ضاميه وبيدا لها مدن فسيح
لين الصحاري أصبحت امن الزهر عطرن تفوح
تنثر من الشير المطر لا حركت لغصان ريح
شدوا البداوة ضعونهم وين الحيا همّه نزوح
يوم ألتقت بيشانهم حنت على الماي الصريح
وأرهفت سمعي وشاقني طيرن على عوده ينوح
وحيد ماله من رفيج يترنم وشل ابصديح
قاليت له هات الخبر وأحلف بسرك ما أبوح
يالين أدفن فالثرى وأكون في قبري طريح
قالي تريث بالهدى ولا تكون يا شاعر لحوح
وأشوفني وسط المنام ذابح ومضنوني ذبيح
قصة نبين ود نبي قصة أستوت من بعد نوح
هات الحكاية كلها واللي جرى وعلم الصحيح
وروحت عنه وراعني ذيبن غدا الحزن ابوضوح
في نظرته ويمشي بهدى منصاب مالدهر وجريح
قال أظلموني واتركوا بين الملا دمي سفوح
شلوا أخوهم بالغصب ودعوه في بيرن يطيح
وراحوا لبوهم يصرخوا ذيبن غزانا فالسروح
يومن مشينا نستبق وتركنا أخونا يستريح
قصة نبين ود نبي في مصر شيدّله صروح
وأبوه روح ناظره يبكي على الوجه المليح
يا فارس الدهما انتخي وخلي الفكر يغدي ويروح
قص الحكاية كلها يا صاحبي وانته فصيح
هيش قصته ذاك النبي اللي انصلب في وسط لوح
وأمه زكيه وطاهره مرسول ويسمى المسيح
يا صاحبي جيت ابعجل راكب على مهرن جموح
ولو طال بي درب السفر أحسّه من شوقي رويح
ولو حن كتمنا أشواقنا الشوق يا ربعي فضوح
يحلا الكرم بأهل الكرم والمدح في أهل المديح
ولو سكنكم فوق القمر بطلع وانا كلي طموح
ألقاك يا بدر الدجى يا راعي الفال السميح
أنتو هلي ولابتي قول الصدق ما هو مزوح
أشهد بأنك عزوتي لا الدهر خلاني كسيح
وهذا الزمن ماله أمن غدار وبأهله يشوح
كم ناس في الظاهر ذهب ومن داخل الجوهر صفيح
وأحيد لك يا صاحبي وسط الحشا قلبن سموح
أسمح إذا دسنا الخطا يا راعي الوجه الفليح
شاقني شوف المزن وبرقن من القبلة يلوح
كريم يا برقن سنا لا تكون في جودك شحيح
أسقي فروعن ذابله ودارن غدا ماها ضحوح
يتلي رعدها بروقها ينهم بها الغيث ويصيح