سامح الله موقد العزلة وليل القمرا
يوم جابوا صورتك فاللحظة المكبوتة
ما قدرت اكتب عجزت اكتب لوجهك واقرا
القصيد يطيح قدامي ويفقد صوته
ليه مرتني ملامحْك الندية تترى
في خريفٍ عرّت ايامه شجرْة التوتة
جيتي انثى سر وانا ابخص بسرّك وادرى
بعد ما كنتي على صدر النقا بنوتة
في ثغرْك الصمت له معنى يباع ويشرى
يا حديث العزف لا ذاب الوتر بالنوتة
الشروق اليا لمح بشفاك ضحكة عذرا
اوغلت شمسه ومالت في جناب قنوته
والغروب ان خيمت بعده نجوم المسرى
لبسك عقد النجوم وطااااال ليل سكوته
وان لمستي للبحر موجة غرام وهذرى
انعتق ملحه وقدم للرضا ياقوته
الندم ساعة تجددها الطعون الخضرا
وانكسار الشوق للعاشق بحرق كروته
ليه مريتي .. وصبري مل فقدك وازرى
يلعن النسيان لا شح الزمان بقوته
اثره هاللحظة مريبة واثر هذي الذكرى
في قلوب اهل المحبة قنبلة موقوتة
لا يجوع العمر ب الصبر الطويل ويعرا
ولا يجف من الظما قلبه ويعلن موته
ارجعي وارمي بحبك في قبور الغدرا
واطرقي بآخر حديدة في خشب تابوته
واذكري لا ناض برق من الغيوم السمرا
بيت من دم القصيد وعبرته ونعوته
الوجيه تغيب .. وجروح الليالي تبرى
وانتي انتي في جدار الذاكرة منحوتة