تعبت ارتب رضاك بلوحة اسراري
كن القلق ريشتي والريح قيثارة
ناري تبي جنتي .. من جنتي ناري
والقلب ناره تشب ولا طفت ناره
حزين انا والندم ياكل من اسواري
ويشدني هالندم ويطول مشواره
مدري منين ابتدي يا غربة اقداري
مدري منين انتهي والروح منهاره
محتار والصمت لعنة والورق عاري
واللي خذاها الزعل بالصمت محتارة
وانتي لغصن الشدو ولمركب الساري
النجمة اللي تدلت من طرف داره
بنتٍ مطر ضحكها عن نخلتي داري
وان حولت نخلتي فالضيق صبّارة
اما اكتبي كل حرف بدفتر القاري
والا تهجي حروف الشعر واسراره
وانا اوعدك لا ابتسمتي وانجلى الطاري
اني لا اخلي الندم والدمع كفّارة