غريب وْغربتي سجنٍ يهدّ أعصاب
شحوب يْلفّني.. حزنٍ صبغ لوني
ما غير هْمومي: السُمّار والأصحاب
لاشي أحيا له، أو أحباب يرثوني
يا بيد التيه والله ما حسبت حْساب
عدودك ظاميه.. والموت بضْعوني
أنادي يا ضياعي.. وين هالغيّاب؟
نساهم وقتهم، أو عمْد نسيوني؟
تعبت أسأل عبث، أبكي، يردّ الباب:
"يا كَم وقْفوا غلا، والحين عافوني"
يطير آخر رجا، تعصاني الأسباب
وأسرار البكا: تفسيرها عْيوني
تعبت أعصر فكر من خِلقته مرتاب
كذا لين أصبحت أفكاري: جْنوني
كثر ما أصدّقك يا "أبريلي" الكذاب..
يجي "مايو" يكذّب صادق ظْنوني