لك من نصيب احلامي البيض حصه
تعال رتب للحكايا مواني
تعال قبل تنام بعطيك قصه
اعيشها لامن خذلني زماني
طفلة وكانت باول العمر لصه
تسرق من البايع رغيف الاماني
سلسالها للحين ماطاح فصه
لكنها طاحت بصمت وتفاني
تفرح لياقالوا كلامن يخصه
وتعض اصابعها دلع شكل ثاني
مامال خصر احلامها طاح نصه
تعزف مواجعها قصيد واغاني
لو ف يدي شريط عمري لاقّصه
عمرٍ بدونك ليه اعيشه واعاني
ياللي تصّف الحزن لا لا ترصّه
عشان لاتسمع بُكاء المحاني
معشوقتك بسنينها الف غصه
تبيك بس الحظ مثلك اناني