نورك المجروح

نورك المجروح ..

ظل ينثر على الظلمة، ضوه

والسلاسل حيلهه من هيبتك..

ذل او خوه

يا حسين السجن

لحسين الذبح ..

انت دوه

يا حسين السم ..

تره حسين العطش

بيك ارتوه

يا حسين الغربه وحده ..

وجسر واحد

بين بغداد الحزينه

وبين محنة نينوه

يا حسين الرمح جسرك ..

مره شال الراس بالطف ..

مره شال الجسم كله ..

عگب ما بالسم ذوه

يا حسين وراسك اعلى الرمح ..

رتّل:

( أم حسِبتم أنَّ أصحابَ الكهف )

وانت سيدهم صرت..

كهفك المظلم تعالى

او قصِر سجّانك هوه

غيّبوك ابوسط طامورة ظلام..

بلا شمس

ضنّوا اتضيع صلاتك..

ما دروا وكت الأذان

العرش واللوح وفؤادك..

كلهن يأذنن سوه

ما دروا مصحف الباري

ابمهجتك سرّه انطوه

ما دروا دمك الطاهر..

للسور وحروفهن كلهن،

حوه

والتوه القرآن لمن

چبدك ابسمّ التوه

وضاق صدر الكائنات..

ابضيق صدرك

واختنگ، حتى الهوه

وسلّمت لله أمرك ..

اوصعد للمعبود سرّك ..

او صرنه كل عام اعلى گبرك

للحزن نرفع لوه