يا قمر الليل

يَا قْمَرْ اللِّيلْ

يَا شَمْسْ النْهَارْ

يَا اللِّي تْضَوِّي الدِّنْيَا وَ الدَّارْ

يَا اللِّي صْيَادْهَا صْعِيبْ

وفْرَاقْهَا أَصْعَبْ مِنْ صْعِيبْ

اسْمْحِيلِي بَاشْ أَرُّوحْ لَبْلَادْ النَّاسْ

ونْوَلِّي غْرِيبْ

الْمُسْتَقْبَلْ نَادَانِي

مَا نِيشْ هَارَبْ مِنْ بْلَادِي وَ اخْوَانِي

مَا نِي حَابْ نْوَلِّي فْرَنْسَاوِي

مَانِي حَابْ نْوَلِّي أَلْمَانِي

يَا لِيرْبِيسْ

أَدِّينِي لْبَارِيسْ

حُطّينِي فِي شَارْلْ دُوڤُولْ

نُخْرَجْ وَ نْوَلِّي غُولْ

فِي مْدِينةْ لاتوريفالْ

مَا شِي غُولْ فِي الْفْسَادْ

حَاشَا

بِصَحْ غُولْ فِي الْخِدْمَهْ

نْجَمَّعْ لَمْوَالْ

نَرْجَعْ لَحْبِيبْتِي

ونْعَمَّرْ بِيتِي

مَا تَتْقَلْقِيشْ

اُصْبْرِي عْلِيَّ عْوِيمَاتْ

ولَعْوِيمَاتْ رَاهِي وَلَّاتْ أَيَّامَاتْ

مَا تَتْقَلْقِيشْ

مَا بِينَاتْنَا التِّيلِيفُونْ وُ لَانْتِيرْنَاتْ

بْرَبِّي نَرْجَعْ

نَرْجَعْ

نَرْجَعْ

لَحْبِيبْتِي

يَا قْمَرْ اللِّيلْ

يَا شَمْسْ النْهَارْ

يَاعُمْرِي

رَبِّي يْطَوَّلْ لَعْمَارْ.