فنجال شوقي يفوح بطيِّب...انفاسك
ياكيفي اللي ليا اشتقتك... تقهويته
أحب اذكِّرْك في صحوتْك ...ونعاسك
مادام طاوعْك قلبي يوم... ناديته
تملا يراع الغرام... بصادق احساسك
واكتب على مملكةْ قلبك:(هنا بيته)
اهديت لك عمري الغالي.. .فدا راسك
وانا لغيرك يمين الله ...ما اهديته
احذر من الهجر لا يطري ...بهوجاسك
والّا يجي منك...علمٍ ...ما تهقويته
خل الجفا لا تمادى ...في تغطراسك
واحذر توطي مقامك ...بعد علّيته
ماجيت عاشق لياقوتك... ولا ماسك
جيتك بمرسال ...من قلبك ...ولبيته
ياعُود ريان ... وسط القلب ... مغراسك
سقيته بْدم شرياني ... وروَّيته
احرص على قلب حَبك واعرف قْياسك
في عمق حبٍّ تقول انك ...تمنيته
وابشر بقلبٍ صدوقٍ يرفض اتعاسك
تنسى معه حُزْنك اللي قبل. عانيته
ويكون لك فرحتَك في العمر وايناسك
ويحيي مشاعرْك،..واحاسيسك الميْته
انت الملك فيه ...والاضلاع حراسك
والامر والنهي لك ...دامك تبنّيته
وان كان ساويتني بالبعض ...من ناسك
قلبي عن الشرك انا صنته ... وصديته
والله م ارضى يكون الغير. ..سيّاسك
تجني على القلب لو بالغير ..سٰاويته
انت المخيّر وخذ من راسك عْطاسك
ماينفع اليا رحلتُ تْقول: يا ليته
واذا نويت الفراق .. ودقت. .اجراسٰك
صبّرت قلبي... على بعدك... وعزّيته
مادام قهوتْك... حامسها بمحماسك
وفنجالها بالجفا والهجر مدّيته
تجَرَّعه واضرب ارباعك على اخماسك
انته شربته بكيفك ...وانت صبيته
اذا انطفى شوق قلبك واعلن افلاسك
حذفت ماضيك من قلبي وصفّيته
ماني بمجبور اذوق المر من كاسك
وانته تحَمَّل خطاك اللي تجنَّيته
ل اغلقت باب الوفا واحكمت ترباسك
واعلنت قطع الوصل واخترت توقيته
واصبحت مجهول عندك بين جلاسك
وادنيت منك البعيد وقلبي اقصيته
اقول دربك خَضر ماني بحبّاسك
وساقي ورا الشاردة ما عمري اشقيته
وان كنت م انت بمطاوع فيَّ وسواسك
وباقي على عهدنا ...والوعد وفّيته
ماسك على حبنا ...بيديك واضراسك
والصد ماجا على ...بالك ولا اطريته
وكنت في دنيتك ...نورك ونبراسك
واغريت قلبي بحبك... واستحليته
خذ من ضلوعي قلم والكبد قرطاسك
واكتب على القلب ذا عرشي... .توليته
وانت المهندس وانا راضي ..بهنداسك
حدد مسارك على قلبي... ..وزاويته
والحبر دمّي وْشغاف القلب... .كراسك
وانا مساري بقلبك ...،.ماتعديته
وبداخل العين لو حبيت ... مجلاسك
في ظل هدْبٍ لخاطر عينك ... ارخيته
ارضي غرورك ...وابدد بالامل ياسك
واجتث بالحب من قلبك تناهيته
وان هزك الشوق يوم وهب نسناسك
أجيك لو دونك العالم ... تحديته