بتفتش جواك على إيه

بتفتش جواك على إيه؟

فتش جواك ع الشيخ

العايش خيبان

الفاشل ف أول محاولة بوسة

مع بنت الجيران

الصايع ف شوارع شرايين شهوته

شهقته... لحظات الانتشا والشبق

السرية... المعلنة

قدام مراية بتكبر العورة

م الأمام... والخلف

ألف تكبيرة صلا

لألف إبليس واقفين وراه

وكلهم... واقفين عراة

فتش جواك ع الشيخ

اللي دايما كانت صلاته على سلم

ولإنه كان في النازل

ما تطلعلوش علامة صلا

يحلف ساعتها ما يدخل الجامع

ويدور جواك على أقرب خمارة

يطلع سكران

السبحة... تتهز ف جيوبه

يفتكر حاجة م الشيخ القديم

من غير أوان للصلا

يدخل الجامع... يتوضا

... يمسك الميكروفون

ويغني أغنية ل عبد الحليم

... ويرقص

والناس ميفرقوش بين الأدان والغنا

ما دام الصوت من الجامع

يبقى دا صوت الفجر

أو حتى صوت العصر...

مش مشكلة

ويقوموا يتوضوا

ويروحوا ع الجامع

يقف الشيخ مذهول

ويبطل م الكسوف... الرقص

ينتظموا ف صفوفهم وراه

والكل يرفع إيديه ف وضع الاستعداد

وتمر لحظة سكوت... سكون

وف أعلى لحظات التجلي...

الكل يبدأ في الغنا والرقص