أنا شُفتَك.. جيت تزور القبر
الصبر يا وَلَدي..
مفيش قدَّامك غير الصبر
أنا شُفتَك جيت
وبروحي وقلبي عليك بَصّيت
شايفاك خَسّيت
متعُولشِ الهَمّ... أنا زينة وحالي تمَام
في القبر مفيش ولا عَيَا
ولا علّة تعوز برشام
الموت..
بيشيل من فوق الجتّة حمول وآلام
وهموم شايلينها فوق الراس
من يوم ما وعينا على الأيام
في القبر يا ولدي
مفيش عاوزين... وبكام
أنا جيت على هنا...
من وجع الدنيا واتْدسّيت
طاب ليه خَسّيت؟
ما تكونش يا واد حاسس بالذنب؟
كان قلبك حامي عَليّا
كإنك من غير قلب
أنا كنت باشِدّ معاك في الدوا والقوت
واللقمة واقفة ف زوري ما قادرة تفوت
مش كنت صبرت شوية لحد ماموت
أو كنت نسيت
طب اديك خسيت
ما تكونش يا واد زعلان؟
علشان أخواتك
خانوا العهد معاك
من يوم ما خدوك بالصوت
سحبوك على لوم وعراك
وباعوك مع يوسف يوم ما اتباع
ورموك ف بير مليان أوجاع
هجروك في الصحرا هناك
عمايلهم فيك
لسَّاها تكون واجعاك؟
أنا صح ما كُنْتشْ واعية
بس الروح سامعاك
القلب الحامي يا ولدي
غريب ف دنيا الناس
والصادق فيهم مَكوِي... أو منداس
لكن كان قلبي وعيني عليك حُرّاس
وماهوش من قلبي إن كنت ف مرة قسيت
طب اديك خّسّيت
طب شوف كام مرّة أنا جيت
أواسيك في منام
أنا لولا غلاوتك عندي
مكنتش جيت في الحلم
عشان أرتاح عندك وأنام
ولا كنت صرخت ف وش اللي ظلموك
أنا جيت مخصوص يوم ما لقيتهم
على شوك القسوة رموك
كان قلبي عليك مربوك...
حَسّيت؟
طب اديك خسيت
زعلان ع الدنيا الماشية بالمقلوب؟
زعلان علشان الناس
من غير إحساس ولا حتى قلوب؟
أنا عاوزة النوبة الجاية
أشوف ضهرك منصوب
ارجع لعيالك يا وليدي
من تاني وعِيش
الدنيا يا ولدي مفيش
والعمر مرَكّب ريش
واللي هايطير من عمرك...
على طول هايروح مايجيش
متعولش الهم
اسمعني يا واد... وخَلّي عندك دم
أنا جيت على هنا...
من وجع الدنيا واتْدسّيت
أنا عاوزة النوبة الجاية
تكون ع الفرح رسيت
لو جيت المرّة الجايّة تزور القبر
امسك يا وليدي حبال الصبر
الصبر يا وَلَدي..
مفيش قدَّامك
غير الصبر