ياشام العز امحينا
من القلب ومن الذاكره
وإوعي في يوم تسامحينا
وخليكي ياشام فاكره
بإننا شعب بيشكك
حتى في صباع إيده
وإننا جمع متفكك
حطب سايب وجب قيده
لاحول ليه ولا قدره
وخليكي ياشام فاكره
ياشام سيبناكي بتعاني
وهللنا إستباح أرضك
لاسامعك ولا سامعاني
وسبناكي اتنهش عرضك
ياشام ياصابره صبر ايوب
نهاية صبرك الجنه
ووجعك بكره اكيد هايدوب
وبكره الشام هاتتحنى
بحنة شمسك الطاهره
وخليكي ياشام فاكره
ياشام دي ساقيه دايربنا
ومربوطين فيها وبندور
كسر بابك واكيد بابنا
ياشامنا جاي عليه الدور
دي نار سوده ماترحمشي
وراها دمار وقدامها
وعلى خُدامها ماتقفشي
هاتاكل كل خُدامها
ولينا في العراق عبره
وخليكي ياشام فاكره