ياسكتين ماشيين وخلف خلاف
مين الحقيقه الكامله ومين أنصاف
مين القتيل فينا ومين اللي اتقتل
ومين ماشافشي الحادثه أو مين شاف
ياسكتين مايوصلوش لطريق
يقدر يطمنا وف يوم يبل الريق
خلاص ماعدشي بنعرف الطعنه
اللي طعنها العدو ولا طعنها صديق
ياسكتين مافيهومشي ولا وصله
والعاده سوده وسيئه الخصله
ياسكتين مالهومشي أي دليل
ولا اتجاههم قادره تحدده بوصله
ياسكتين ووجعنا فيهم اتمد
ونار خلافكوا رافضه ليه تهمد
مين اللي نازل نفخ في شرارها
وبحسن نيه ولا كان دا بعمد
ياسكه رايحه وسكه مش رايحه
طالقين سهامكم ع الخطى طايحه
ياسكتين في الهم مشتركين
نفس الوجع كل السكك طارحه