إيه يعني أكون بلياتشو عجوز؟!
مانا كنت شباب
وايامها الكل بيتمنوا
يبقولي اصحاب
بإشاره من ايدي تتفتح
كل الأبواب
بلياتشو صحيح
لكن فني
كان كله اعجاب
كان فني هو راسمالي
ودايما بيفوز
بلياتشو صحيح
لكن عُمري مابقيت أراجوز
بلياتشو عجوز زي الدنيا
ماهيا بميت لون
بلياتشو الناس نسيت فنه
ونسيه الكون
في كيانه الحزن وف دمه
أصبح مسجون
مرهون للدنيا بكام ضحكه
ولا راضيه تهون
وكأن الضحك المكتوبله
أصبح لايجوز
والحزن الأخرس دا الباقي
لبلياتشو عجوز