من زارني في مدهلي ياهلابه
يامرحبا به عد ماعسعس الليل
وعداد ماطاح المطر من سحابه
وعد النجوم اللي بسماء نجمة سهيل
واللي يكف الرجل من حر مابه
اقفايته متساويه والمقابيل
من يطرد المقفي ألا واعذابه
يجيه من الحقران مايطفح الكيل
يمشي وراه وضايعٍ في سرابه
والخاتمه يلقا ردي المحاصيل
عفت الطريق اللي برجله وطابه
هاذاك متعود على مسلك الميل
لو كان اقرب من قريب القرابه
لانقبل العايل ولانقبل انعيل
القصد واضح من رموز الكتابه
افهم قبل نعطيك بعض التفاصيل
نبي نتجمع دون حضرت جنابه
حتى ولو حط الحيل والمحابيل
والخاتمه مالي بكثر الطلابه
قربلي الدله ودن الفناجيل