رغم انف طغيان الجناة الطحاطيح
والله كبيرة يا معاقل صروحي
صدي الظروف العاتية واهزمي الريح
عيشي معايا في طلاسم وضوحي
الوقت ارعن والليالي مشافيح
صمت المكان يفوق صمته طموحي
صندوق قلبي ما تفكه مفاتيح
دونه ضلوع صافنات جموحي
لا بارك الله بالوجيه المكاليح
سود القلوب اللي تبنو جروحي
قفو بأعذب فاتنة ريمة السيح
الجادل اللي ما تمنت نزوحي
قفّت وأنا أشوف الدموع المسافيح
ما ودي اسمع سالفتها ولا اوحي
ما بين اصيح وبين ابصبر ولا اصيح
مثل الذي ما بين صمتي وبوحي
حضّي عجوز تمشي شوي وتطيح
هي عنكبوت وسلكها خيط روحي
الحر ما يحرث حقول الفلاليح
ماهو على هزل النوايا كدوحي
يا صمتي العاجز يكفيك تلميح
لو تظهر العفة سكوتك ذبوحي
هدوء قبل العاصفة دون توضيح
دمعة قهر تسبق تقاطيع نوحي
أعاني الديجور وين المصابيح
عجزت احصلّلي صديقٍ نصوحي
ما عدت أطيقك يا حنان التماسيح
السم بأنيابك ودمعك سفوحي
وين أنت ياللي تسكن القلب وتريح
يسعد خفوقي شوف وجه سموحي
الناس تفرح مادرو بالمجاريح
وأنا خفوقي بين حدبه يفوحي
اعصر صديد المهزلة واخرج القيح
ما يستفيد إلا لسانٍ لحوحي