يا ضابط الإيقاع تكفى هَدّ هَدّ
دوبك على قلب الشقى لا تتعبه
يجتاحني حبك ويقفز سَدّ سَدّ
ما يردعه بابٍ مقفل وعتبه
حتى ملكت أكبر مساحه حَدّ حَدّ
تحتلها من منكبه ليا منكبه
دولة محبك أذعنت لك بَدّ بَدّ
صفيتها من أية عوالق وأتربه
ريضانها سهله عن أية شَدّ شَدّ
حتى الحنايا بالخزاما معشبه
عين الرضا تكفي بليا رَدّ رَدّ
قلبٍ محب وراس ماله مكسبه
من الثمر وعقود لولك أَدّ أَدّ
زكاتك اللي في حلالك موجبه
أخاف من يومن يجي به صَدّ صَدّ
وأطيح من برجي قبل لا أنتبه
كم مرّه أسأل بعد جهد وكَدّ كَدّ
ويش أمنياته لجل أحقق مطلبه
يرضي غروره يوم أقوله فَدّ فَدّ
والا القصايد يوم أغني تعجبه
شعر النبط لو قمت أمده مَدّ مَدّ
أو أقصره وأمحيه وارجع وأكتبه
وصفه يحير شاعرٍ به لَدّ لَدّ
حتى يجيب من أعذب الشعر أكذبه
والا الشمالي راح يضرب يَدّ يَدّ
من حيرته مغير يفتل في اشنبه
هي للقريحه روح وأيضا نَدّ نَدّ
والقاف هي عوده وناره وحطبه
كم طاح شيخ من عيون وضَدّ ضَدّ
بعد الهزيمة قال حامض ياعنبه
لنّه وريث الزين كله جَدّ جَدّ
فيه الحلا من أصل بيته ونسبه
غير العيون الغنج منه الخَدّ خَدّ
كل الليال السرمدية ترغبه
والعود راهي ممتلي والقَدّ قَدّ
يأخذ من العفري قوامٍ ورقبه
جول النحل ما بين هات ووَدّ وَدّ
على مايونيزه وحمرة كتشبه
اليوم أنا طيب لكن الغَدّ غَدّ
مدري يزين الحال والا يسلبه
أقول لحيامه تفضّل عَدّ عَدّ
يا مرحبا بالموت لو كان سببه