ثيابك باليه وادري ف نفسك تشتري دولاب
على مسمار علّقت الأمل كلّه ف جدرانك .!
عيونك توشي انّ الدمع عالق في هدبك احباب
تخاف إنّه يطيح وتنكسر في نظرة اخوانك
ثمان سنين وامالك وهَم يسكن شقق عزّاب
واذا زاد الإجار احيان تحزم شنطة احزانك
كتبْك اشياك لوحاتك تعب يستوطن الأهداب
ولا لك حول وتأنِق حياتك بابسط أحيانك
تظنّ امّك ويخدش ظنّها قلبك ألم وغْياب
وتبقى خوف في ذكرى الرّيال وسجن ديّانك
واذا بْلادك تزرّر صدرها عن حلمك المرتاب
تروح اسرع تلملم عن بِلادك دمعة اشجانك
عشان الدمع ما يجرح يديها يفرح المغتاب
أصيل وقلبك الهيل الكريم وسبحة ايمانك
تعيش انسان في حبة تميسك والتفاف اصحاب
ولا تخسر يدينك هيبتك و تقلّ من شانك
وأحسّ الفقر طفلٍ لا نثر في كلْ غرفْك تْراب
تبسمل له رضاك وتطعمه من خبز وجدانك
واشوف الأرض سجادة صلاة و طاولة حطّاب
برغم البرد تعجز لا تشب فيها ل: كتمانك
حزين وبين كفّينك صداع وذكريات احباب
تنش الياس عن وجهك وتنسى تنفض اجفانك
هنا (حزنك) نشيدٍ للوطن والعابرين اغراب
ولكنّ الوطن أخضر يظل ف عدل ميزانك