باديٍ راس العَلاهْ
هَيَّضَنْيَهْ مِن هواه
أبدع القول العجيب
قول يعجب مَن قَراه
أوّلَه قول الغزل
في حسينات الحلاه
الريوم المِنِّسات
كاملاتٍ للصِفاه
بالخدود وْبالعُنوق
والمضمَّر ما حَلاه
وإن تَبسّم بالثِمان
كالبَرَدْ بين الشِفاه
كالفنانيل النُهود
ما بعد وصفه صِفاه
في عيونه كالرماح
يقتلن من جا حِذاه
والجدايل سابحات
أسمَرِ فوق القَطاه
وان بِليت بحبّ ذا
ما تَعَيّن لَهْ دواه
طِبّ حَقّ العاشقين
يْذَكِر ريقهْ وِفاه
حلّلوه العارفين
للصَبايا والصِباه
ما حَلا دنيا ودين
لي تجمّع في الفَناه
في العمر هذا يزين
يِرَيْعْ للشايبْ صِباه
وَنّتي ونّة عِليل
لي مَرَض ما به شفاه
أو كما وَنّة يتيم
لي ما تْشَرَّع في رباه
من فراق اللي أوِدّه
في الحشا ساكن غَلاه
لو يطول الوقت والله
لو نسيني ما انَساه
كاملٍ كل المعاني
حاويٍ كل الصِفاه
يعل داره من الوِسامي
تنسقَى ذيك الفَلاه
لِي يَشَتِّيها حَبيبي
نور عيني هو جداه
أبْعَدوني من دياره
لي مشقّيني هواه
في ديارٍ ما اعَرِفْها
ولا اعَرِف فيها لَغاه
ما ترى فيها مساجد
ولا مكانٍ للصلاه
غير ناس مْسَرْوَلين
والنِسا كلٍ عُراه
وَلَا يسَلّم لي لقيتَه
وِان رِمَس ما اعْرِف احْكاه
والشرُب فيها مباح
الخمِر واللي شَراه
يعْلِني ما عاد أجيها
في العمر طول الحياه
قَبْلِيَهْ راكان شافَه
بارقٍ ياضي سَناه
ديرةٍ ما تِصْلَح إِلْيَهْ
وِدِّيَه بْشوف البَداه
العرب لي ينتَمون
صدق ما فيهم رَداه
والختِم صلّوا على احمد
سيّدي خير البَراه