ارقد وآمن والعوض ب المقابيل
واركن على اللي يعدل الميل لا مال
سبحانه يحول النوايب تساهيل
ويامر وينهى ويعمر ديار وآجال
من جاد بالنوماس جود المعاميل
جاد الولي باللي مضى به والإقبال
يوحى ونينك كل ما جرهد الليل
وأنت الذي هيّضت في عِرفك أمثال
ومستاحشٍ بين الحشود المخاليل
لا يا نظر عيني أيا طيّب الفال
يا شوق ما يمّي شبوح ومراسيل
وشلفا الفراق بغاير الضلع ميّال
لا واهنيك يا سليل المشاكيل
اللي لهم في هومة العز مقيال
ولا يا حفيد ملقحّين المحاصيل
أهل العروبة فيكم الخير همّال
أنتم زحولٍ نوّهوا بالمراحيل
لصيتٍ عتيقٍ نافلٍ كل الأجيال
واقديت في طيبٍ شهوده مفاعيل
بك الكرم والدين مع زين الأفعال
قالوا تمنى قلت شوق السماعيل
وقالوا تعزوى طايلة كل من طال
فيك الجموح اللي يرجّح به الكيل
وبكِ الحسن فصِّل على كيفة البال
وبك عزة الأجواد والبن والهيل
يا معرّب الجدين والعم والخال
ولفتة شموخٍ تنسف القال والقيل
يا مهرةٍ يشفق لها كل خيّال
بالطيب شفناكم سواة الهرافيل
والعرق صافي ما به سموم وحثال
أنتي حفيدة روس قومٍ رجاجيل
وبنت التي حثّت على بذل الأموال
يا بنت من لا عرجدن المواحيل
روس الخوالد ما تدنق لها جبال
روس الدهاة اللي تسمى زحاحيل
مطوعين الصعب والحق ينقال
رمزٍ بالحميّا وزبن المداخيل
قومٍ صواريم الوغى فخر وإجلال
يا شوق رقمك في صفوف الزعاجيل
أجواد ماقفها على روس الأتلال
يا عاذلك جعله يذوق الغرابيل
وجعله يذوق من الدهر ضيم وإذلال
ويقفي مذلٍ مع دكاك الغراميل
ويخزى مقامه وسط مجلاس ورجال
خبري بسِلمك سايٍق للتنافيل
وتلبس من النخوة على راسك جلال
وتقدم أيا ترثةٍ شيوخٍ حلاحيل
للضيف والعاني مزبّن ومدهال
كم فارسٍ عمهوج بالباس والحيل
حرٍ على متنه من الكايدة جال
يا شوق ماني من ربوع المخاييل
وماني من اللي يشعل الغل باشعال
أنا من اللي يضرب الويل بالويل
من القصيم اللي لها ابراك وظلال
واليا انتخيتي للدروب الدواويل
وجفت عذوقٍ حدها أشهب اللال
ماهو بعيب يهمّلن الهماليل
وجعل الدموع اليا سكبت بألف حلّال
وماني من اللي بالمواقيف حلحيل
وماني من اللي رايبٍ شيل الأحمال
قد شيع في نجد العذية وقد قيل
من طاب في قصده يطيّب له الحال
وكفٍ تصب من المكارم فناجيل
ماهي مثل من عادته هز فنجال
ماهي غريبة تدمي بسوجة الميل
وأنت التي تطرب عزاويك أجيال
بنتٍ لها مجدٍ كما طلعة سهيل
وذكرٍ يشاع وخير مرقب ومنزال
وزينك طغى من يرقصن بالخلاخيل
وعروبةٍ يا ذايع الصيت باسبال
يا شوق لا تبكين قيظ المشاعيل
ورمح القهر في كحلة العين قتّال
ويا شوق ما سوّن سواة المشاغيل
وما عاقهن يا شوق عن طيب الأعمال
والله يحجاكم عن عيون المغاليل
ويغيثكم بالغفر والرزق والمال