بتعرض لمؤمرة دنيئة
خلت شكلى العام مش حلو
حاجة بجد تغيظ وتجن
مافيش عفريت
ولا مدعوق جن
بقى عايز يسمع ف كلامى
كل ما احضر منهم حد
ثوانى... ويطير من قدامى
لما حقيقى قرفت بجد
وباب ورا باب عمال يتسد
وبرجع اراجع نفسى كتير
جايز بغلط ف التحضير
لكن يرجع عقلى يشت
مافيش تعويذة فيها تغير
وانا مش فاهم اية الموضوع
والموضوع بقى ليه ممنوع
وبعد مافاض بى الكيل وزهقت
وزهقى واخدنى لقمة يأسى
وانا رايح ع القصر العينى
هاقطع تذكرة واخلع ضرسى
الا واقابل عفريت منهم
شايل بنتة وداخل يكشف
لسة يادوب هانطق واتكلم
قاللى اعتقنى اعمل معروف
ودى مافيهاش ياحبيبى كسوف
مرة تجبنى من الحمام
ومرة انزلك م الاتوبيس
وعاملى مشاكل مع ابليس
وان كان على قسط الجمعية
فاضل لسة اربع تيام
ف خلى عندك دم
انا زيك
عندى عيال وظروف
وده غير السكر والغضروف
تصدق بالله يابنى ادم
اخر رز وأخر زيت
كنت سارقهم لك م البيت
فا اتلم