بسافر فيكى
بنفس ارتجافى
وخوفى
لا ندعة سر من روحى
تخطى جروحها وجروحى
تعكر صفو صلواتك
بنفس اندهاشى
وماشى بلا حراس
باغسل باللى باقى من ندى الاحساس
مواجعى
بسافر فيكى وانا مهموم
بعشقك المظلوم
ف قلبك الملهوف
لضمه الحبيبين
يوم مايتلاقو ولو صدفه
بسافر فيكى بجنونى
عصفور وفارد جناح الغنا
محموم بالعشق بيزقزق
سحر البراح خلاه
طاير بكل قواه
وغناه.. معجون بحنة فجر بيشقشق
بسافر فيكى وانا مقتول
بقلقى الحزين
وتقل السنين
نشوان بالمعرفه والسر
مستنى لحظه مايرمى الشجن
ضله ع البيوت
وخروج البنات
بالعشق والحكايات
تنزع فتيل الغنا
من سحرها المكبوت
وبصوت صبي
احساسه بشارة نبى
تغنى للحب اللى مرر سكره
باسافر فيكى وانا حيران
بنفس طعم الحزن
وقوه الامتثال ف الحضن
بحتياجى الشديد
لرجوعى تانى الغصن
برفضى المتاح
وجرحى المباح
تحت سنابك خيلك المصلوبه
كملهمات للفن
بسافر فيكى سر متسرب
ف ضحكه بجهل
فوق شفايف كهل
قلبه واعر سهل
لكنى برجع ف نهايه رحلتى
بغنوتى
واللى باقى يادوب من ضحكتى
لاهى قادره خطوتى تبعد
ولا قادره خطوتى تقرب.