للعزيز الجابني الشو

للعزيز الجابني الشوگ

اعلى بوابة حنانه

وبيده سَدهه

لا تسِدهه..

بيك اشعر..

وبْعتابك

وبجروحك

وهذي چلمات اعتذاري..

بلكي لجروحك تشدهه..

لا تردهه

هالرسالة امن الگلب..

لا، لا تردهه

خوفي من ردك..

تظن امقصّر آنه اوياك..

وآنه لمهجتي افراگك مردهه

وخوفي من صدّك تظن ناسيك لحظة..

لا تصد عني وتعلم..

ما تحَملِ الروح صدهه

شلون انسه

شلون انسه..

وآنه نوحي اعليك..

نوح الشافت بعرس الولد

ذبحة ولدهه

شلون انسه..

وآنه كل لحظة التمر..

من غير شوفك..

ما اودهه

ومن حياتي ما أعِدهه

يالرحت عني..

اوعِفت روحي ابوجِدهه

يا دواهه..

يا ضمدهه..

يا حلمهه..

يا وهدهه..

وجنة احلامي اوّردهه

لا تظن من عگب عينك..

تغفه عيناي ابرغدهه

شلون تغفه العين..

لو فگدت جفنهه؟

وشيسدهه؟

شلون تغفه؟

ودمعي سال اعليك ابيض..

يدر من ذاك الحليب..

اللي رضعته اوياك

چان لروحك اوروحي..

شهَدهه

ابفرگِتك عاتبت روحي..

شلون ما عافت جسدهه

يا عجيبة..

طلع من عيني الحليب..

وروحي ما طلعت بعدهه