يا لون خد الورد.. كلما ردِت تبتعد..
تگرب عليّه اكثر
وعن عيني مهما غبت.. انت اويه روحي ذبِت..
وحبك علي اثّر
كل لحظة اشتاگ الك.. كل لحظة اتمثّلك..
ابصورة حِسِن تظهر
هذا انت شمس الحِسِن..
بيك الگلب منفِتن.. تفاح لا مو وجِن
بخدودك امصوَّر
هذا انت من الخجل..
خدّك جمر واشتعل.. بيك الجمال انذهل
يالشامتك عنبر
اهل الشعر يا ترف.. ايشَبهون بيك البدر.. گالوا الك توأم
وآنه ابهواك اعترف.. وبدالهم اعتذر.. والگالهه اتوهّم
بحر المعاني يجِف.. وتخلص قوافي الشعر.. ومن حِسنك اتعلم
ابوصفك تراني اختلف.. مو بدر، انت فجر..
بيك النظر ينسحر..
والشاهدك كبّر
والشبّهك بالگمر.. غلطان ما يعرفك.. معذور ما شافك
نورك عماله البصر.. واحتار شيوصّفك.. يالكاملة اوصافك
شيوصفك انت بحر.. والراد يتعرّفك.. يغرگ بأطرافك
سبحان من جمّلك..
سبحان من عدّلك.. ما ادري جن لو ملك..
بين البشر أسفر
سيطر عليه الهوه.. و رويحتي اتعنّتك.. نامت على اشفافك
وگلبي ابغرامك دوه.. مجنون بمحبتك.. محتاج انصافك
وبشفافك انت الدوة.. هايم انه ابصحوتك.. سكران باطيافك
يا عين ريم الفله..
امن الخالق امكحلة.. بشفافك الذابلة..
لتلومني امن اسكر
اعلى اشفافك الذابلة اجناحات گلبي ترِف
وبس نظرة من ناظرك لجروح هجرك ترِف
لو تمر نسمة هوه ابظلّك عيوني ترِف
زعْلَك عليّه زهَر مُر والهجِر ازهار
أزرع طريق العشگ لجلك ورد وازهار
ياللي ابجمالك سطع وجه الصبح وازهار
ابشوفة حِسِن منظرك حِن عالوِلِف يا ترِف
ما شفت مثلك بشر..
يا نسمة وكت السحر..
لجلك عشگت السهر..
ومعذور من اسهر