بنشد ولاني في سؤالي مطوّل
ياهل العقول المستنيرة والألباب
لاجاك ضيفك وقت حضر التجوّل
كيف التصرف يا كريمين الأشناب
ما عندي إلا مثل قول المقول
أنا ومن ذي فعلته ماحن أصحاب
افلح زمان المضرطه والتسول
واللي يقل ذا وقتها شخص كذاب
الضيف ضيف الله وحقه ترى أول
مهما يكون الضيف نفتح له الباب
لو غرموني عادتي ما تحول
والرزق رزقي يضمنه رب الأرباب
ما فيه في حظر التجول تجول
لا حد يجينا لو يكن ظمن الأقراب
الأمر من سلمان لو هو مطول
سمعاً وطاعة يا ملك نقفل الباب
اللي يجيء في الحظر هذا متسؤل
ما هو بوقت للزيارة والأحباب
أبأخذ علومه ولا أني مطول
لا تأمن العقرب ولا تأمن الداب
يا خوي أبو عامر هروجك تهوّل
والناس قالوا كل شي له أسباب
ضيفٍ يجي ويروح ماهو مطوّل
فيه أحتسب للأجر لا تغلق الباب
الحل شوف مكافحين التسول
بلغهم إن شفته يوطوط على الباب
الوضع متغير ولا هو ب الأول
والحرص واجب والبلاوي لها أسباب
حنا بعصر التقنية والتحول
يقدر يراسلنا ليا اشتاق واتساب
واللي علينا في لزومه يعول
في خدمته نخدم ولو من ورا حجاب
ما هوب هذا الوقت هذا من أول
يا مرحبا والله بمن يطرق الباب
ولا بهذا الوضع ما حد مخول
هذا كورونا فرق أحباب وصحاب
ضيف الله العامري حد السيف
خلك بماجوب الضيافة مخول
وقدم له الماجود يا عرب الأنساب
اليوم في وقتن صراحه يهول
احذر من العقرب ومن لسعة الداب
الضيف لاجانا نقل عد حول
يا مرحبا يا ضيف وفتح له الباب
احنا نسوي مثل قول المقول
الجود ملما جود يا حي الأحباب
هذا زمانن يابن عامر محول
بسباب فيروسن عجز فيه لاطباب
لا جاك ضيفن فكرمه لا يطول
اعطه مواجيبه وشرع له الباب
من ناحيه ماني عليها مخول
لكنها في قاب نشده وترحاب
ماني بواقف قدم بيتي اضول
أكيد ضيفي ماقلط غير لأسباب
من جاك قل دور وعل خط حول
به عشرت الافن لمن يفتح الباب
والحضر بإذن الله ما هو مطول
وإلى انتها فهلين يا عزّ الأحباب
لا جاك قله مرحبا بك وحول
طلاق ما خليك واقف على الباب
فل الحجاج وبالتراحيب مول
الضيف ضيف الله ولا تحسب حساب