مين يفتش في الحنايا
ولا يسأل ليا عندُه؟
يكشِف الوجد اللي سَابح جوَه قلبُه؟!
مين يروح لُه؟
يقول له: إوصِل،
الحلم راح لليأس ينعي مُر حالُه؟!
والأمل..
جدد في بكره وفِيه آمالُه
وشوق في القلب عذبني بجروحي
قالي روحي
قلت أقول لُه
يمكن ألقى رجايا عندُه
قلت أقول له
يمكن اصفح للزمان لما يوصلني بردُه
اعمل إيه ف القلب.. حَبُه؟
واشتكى لليل وصاحبُه
العيون والقلب صبحوا للسهاد.. رُفقات ليلاتي
يسمعوا للناي ويبكوا عَ الناياتي!
يا حياتي
كل دقاتي العصية..
صحصحت
زارها الربيع.. فاح منها حبك
وارتوى
نحل الهوى
طرح الفرَح
من شهد طِيبتك
مين يروح لُه؟
يشرح ويوصف لهفتي
يِوَسَطْ طيبتُه.. بين قلبي وقلبُه؟
مين يروح لُه؟
يِبْدُر الغيم اللي هاطل من دموعي
يرشرشُه على عُشب قلبُه
يقول: بحبُه
يمكن ألقىَ قلبُه عارف
ويمكن ما يعرف
أو عندُه ما يمنع.. يصدُه
روح وقول لُه يا قمر
أو أنت يا نجم..
روح لعندُه
قول لُه
حقَّه!
لو كان زي حالي،
والخجل..
طبعُه اللي مانعُه؟!