لسه يا مصر ف شعبك ضي

لسه يا مصر ف شعبك ضيْ.

الله حيْ... الله حيْ

لسه يا مصر ف شعبك ضيْ

لسه ما ماتشي.. ولا سلّمشي

لسه بيرسم بكره الجي

مهما جيوش الليل بتعمّه

لجل تغمه

ولا بيهمه

يزرع صبره غطان.. يرويها..

.. بدعوة لربه

وامّا يفيض به

يبقى الجمل الهايج من طيش صاحبه

لمّا بينقش ضهره بكيْ

الله حيْ... الله حيْ

لسه يا مصر ف شعبك ضيْ

لسه بقيد في صوابعه العشرة

لسه بيعرف حق العشرة

لسه مخزّن جواه قدرة

لسه بيقدر برضو يفرّق

بين الدهب الصافي وبين القشرة

لسه بيعرف قيمة الراجل

اللي مداسه بمليون سافل

ويطلعه من مليون عرة

ولا بتخيلشي عليه ألبنضا

وألاعيب شيحة لأهل الحيْ

الله حيْ... الله حيْ

لسه يا مصر ف شعبك ضيْ

سيبك بقى من لف.. ولَيْ

هِدّي جبال الصمت وشقّي

كنتي.. ولسه.. ولسه هتبقي

أمّ الدنيا.. وأااادّ الدنيا.. غربي وشرقي

من غير فزلكة.. من غير سهوكة

من غير بكا بدموع من مَيْ

واحنا بناكل لحمك نيْ!!!!

الله حيْ... الله حيْ

لسه يا مصر ف شعبك ضيْ

لسه ما ماتشي.. ولا سلّمشي

لسه بيرسم بكره الجي