يحسب انّي بآتنحّى عن طريقة بالسهوله
وأترك اللي صار منّه صار شيٍّ ماهقيته
الخيانه زخرفوها ولْبسة تاج البطوله
كيف بالظلم آتحاكم؟ بذنب ماواللّه جنيته
يعني الاّ آتقرّب وادفع لقلبك عموله
ثوب مايعجب ضميري يعلم اللّه ما ارتديته
من عرفتك هذا طبعك دايم احكامك عجوله
وان زعلت بدون تدري تهدم اللي لك بنيته
وبالعطى دايم يدينك عن حبايبك امغلوله
صَدّ قلبي عن جنابك لا تحسب انّك كويته
مُهرة الشوق وغرامه صارت بقلبي جفوله
ماتبي مضمار زيفك عقب ماهي مهتويته
كان لي مرسال شوق..مات شوقي مع رسوله
الرسول أبيات شعري وكلّ بيتٍ بك محيته
العنب يازين طعمه دام كفّينك تطوله
وان عجزت ولا وصلته.. شي طبيعي لو هجيته
اختصاراً للكلام تدري ويش اللي بقوله؟
الغرام اللي جمعنا..يخرب اللّه بيت بيته