في الليل جوايا شئون
حزن وفرح وسكون
واعشق ليالي السهارى
اعشقها مهما تكون
سهران بناجي حبيبي
بكل معنى ولون
هايم في دنيا جماله
مغرم بسحر عيون
سهران بنادي الجمال
مسحور بسحر الكون
باسمع غناوي أصيله
بتقولها أحلى عيون
واسمع لرنة وتر
حلوة تهز الكون
بتميل عليها الصبايا
رقص وطرب مجنون
واسمع لطير المسا
كروان وصوته حنون
ومن حفيف الشجر
أنغام تهز غصون
واسمع لأنة الم
عاشق بصوت مبحوح
يشجي وقلبه بيبكي
من الفراق مجروح
كاتم في قلبه ولكن
مع الجراح بيبوح
يناجي طيف اللي غايب
والدمع بات مسموح
تسمع صداه م الالم
والآهه ويا النوح
يشوف خياله قصاده
وف كل مرسى يروح
يا عاشقين الليالي
لليل جوايا شئون
بتعيش معايا وهيه
حزن وفرح وسكون