مرت علينا سنين واحنا نشاطا
واليوم لا والله ما به نشاطي
كنا على صم الصعيبات ناطا
واليوم صار الحيل بالحيل واطي
خذنا بسجات الليال انبساطا
يوم أنها عذبه وفيها انبساطي
ويالله يا محيي هشيم الحماطا
عفوك نهار أمر فوق السراطي
في موقف ما فيه ينفع وساطا
هذا كلام الصدق ماهو هياطي
والموت حذرا ساعته لا تباطا
خذلك دفاعن جور برد الشباطي
حيالله بيوت الشعر والنقاطا
والشاعر اللى جاب جزل النقاطي
عشنا وشفنا في زمنا انحطاطا
هذا زمانٍ صار فيه انحطاطي
راحوا رجال العزّ والانضباطا
وعشنا بعالم يفقد الانضباطي
كثروا دعاة الكفر والاختلاطا
والعقد يا رتيبان فيه انفراطي
احس وسط الجوف نارٍ تشاطا
مما تشوف عيوني الصدر شاطي
مالوم رجالٍ يجيه انجلاطا
ألوم من عينه عليها غطاطي