وردت نبع الامنيات وجف من قدام اجيه
حتى الاماني مابقي لي في منابعها نصيب
والصاحب اللي كنت متمني لقاه ومرتجيه
خيب ظنوني فيه وانا احسبت ظني مايخيب
ان جيت بشكي مايطاوعني ضميري واشتكيه
واشكي لمن والقلب عيّا لا يطيع ولا يجيب
احترت انا من بعد صده بين ابيه وما أبيه
من بعد سبب لي جروحٍ مايداويها الطبيب
اشتاق له واحنّ له وافزّ له واشفق عليه
والشوق جامح في خفوقي له وترويضه صعيب
عقلي يقل ياقلب من باعك خساره تشتريه
ويجاوبه قلبي بونّاتٍ يرافقها نحيب
اخلف مواثيقه وكابر بالجفا واحترت فيه
وانكر غرامي لين صرت بدنيته شخصٍ غريب
ضاع الوفا من قلبه اللي كان قلبي محتويه
قلبٍ وهبته له فدا ولا لغيره به نصيب
الاحترام اسما معاني الحب في القلب النزيه
والاهتمام اقوى الروابط بين محبوب وحبيب
ان كان ناوي للفراق وصار قلبه مرتضيه
مع السلامة واقبل المقسوم بالصدر الرحيب