العود لاطاحت سنونه

العود لاطاحت سنونه

ماتنفعه كثرة أمواله

نياقه الشعل مزيونه

لكن ما اغلى من عياله

دنيا بها الناس مفتونه

والحمل وينه ياجمّاله

ماهي على طول مضمونه

كلٍ تبي تاقف اجاله

ناسٍ شقيّه.. ومديونه

والحال باقي على حاله

لكن يابو رهف صونه

احفظ شقى اليوم ورياله

موتَرْك جوّد دركسونه

واللاش خلّه لمقياله

اللي ملى بالكرى عيونه

يصبح على اهل

الوطن عاله

وراه ناسٍ يحدّونه

إلين مايكثر هباله

ان كان ماجنّت جنونه

يبطي ولا تِذكر افعاله

ياعنك يامقشر ظنونه

يموت والمجد ما ناله

راع الوفا ننشد شلونه

والا الرّدي مالنا وماله

شيٍ من العرف.. عربونه

ياحاكر العِرف..برجاله

وان قالوا الناس ملسونه

كلً يروّح على فاله

انا عريبه ومصيونه

راسي على الفخر والطاله

لو هزّت حموله متونه

العزّ ماهزّ فنجاله

قصيدي متميّز بلونه

مثل السديري مع اجياله

اعدّها ابيات موزونه

وابعد عن الغث وهزاله

للشعر حدّين مسنونه

وللقاف مربط وخيّاله

لو القلم باح مكنونه

خيال..وابلَغْه من قاله

كلٍ يغنّي على شجونه

والنفس طربه وميّاله

في كل وادٍ يهيمونه

ويبقى على القمّه جزاله

درّه وفالبحر مدفونه

ربيبة الفكر مختاله

هذينصيحه ومضمونه

خذها على هيئة رساله

العود لا طاحت سنونه

ماتنفعه كثرة امواله!!

الشعل لو كان مزيونه

ماهيب اغلى من عياله!!