الهاجس اللي مبتليني على الدوم
عجزت أنا لا أبوح سرّه وكتمته
يالعنبو جدّه حرم عيني النوم
ليني على المسحوب همّي نظمته
ما أعتدت أذمّ القلب وأشكيه وألوم
بس لمتى صبري يغطّيه صمته!
ياهيه ياللي عن ردى الناس محشوم
ضمّيته بقلبي غلا وإحتشمته
لك في عيوني حلم مبطي ومرسوم
انته بنيت الحلم والا هدمته؟!
خليتني مابين شرهااات وهموم
وأنا لوصلك..كل أمري حسمته
أجيك كلي قلب وافي ومغروم
لجل غلاك بضلع صدري حزمته!
يعني بكلام الناس واضح ومفهوم
عن درب غيرك..تبت..صدق وعصمته
من كثر ماهو منك يائس..ومحروم
كم واحدن لا مّر بإسمك زهمته!
في ذمّتي هالكون لولاااك معدوم
وفي ذمتي لولا وجودك عدمته!
لو ردّني عن وصلك أحكام وسلوم
انته ملكت القلب..وانته حكمته