بينه وبين النغم ما يشبه الاندماج
متوحدين في بعض مثل السحب والمطر
في وقفته يعتدل في الفن كل اعوجاج
ومن صوته تسيل موسيقى ويعزف وتر
رفيق ليل السهارى واعتدال المزاج
عطر المواعيد وأجمل ما يبوح السهر
كم مال من وقفته غصن يحب الغناج
وكم سوسن الليل وأهدى للعذارى قمر
كأن في "آهته" لأهل المحبة علاج
وكأن "صوته" وطن للمتعب من السفر
يهديك في ليلك الحالك شموع وسراج
ياخذ من أقصاك لحظات الألم والكدر
من نبرة غناه يتموسق أمل وابتهاج
تحس روحك معه فوق السحايب تمر
إن أطرب أهل البحر غنى البحر له وماج
وإن أطرب البر ترقص له غصون الشجر
نجم اعتلى كن ما بينه وغيره سياج
كم صوت دونه تهاوى، كم محاكي قصر
ستين في الفن، كنه لبَّس الفن تاج
ستين في الفن ما كانت مجرد عمر!
أوضح من النور وأصفى من بريق الزجاج
تمرحلت واكتمل فيها الوهج للنظر
تكونت كيف؟ مدري.. بس كانت نتاج
الموهبة، والذكاء، والتضحية، والصبر
ستين كانت له وللفن باب انفراج
وكانت لعشاق روح الفن حلم ومفر
صوته تعدى الحدود اللي تحده وراج
واستاهل يكون "فنان العرب" من دهر
بينه وبين الموسيقى انتما وامتزاج
من فيهم يغني الثاني ويعزف وتر؟!