هذا المساء اهتزّت أغصان الحنين ومرّوا أصحابي على البال
وهبّ الوله من تفاصيل الغياب وياسمين الشوق: مرسول
والذاكرة ما تساقطت من زوايا بوحها إلا أشباح وأزوال
ولا تسنبل حصاد أيامها إلا من تجذر مزن وهطول
قالت: هي الذكريات وقالت الذكرى: نهار وشمس وظلال
وليل وسهارى وضحكات الصحاب لبعضهم ولسان معسول
لحظات تأخذ من أيام العمر زهر العمر والقلب ميال
للحظة اللي يخلدها الفرح في رحلة سنينه ولا تزول
والشعر، قلت: أيش؟! قالت: ما يقولك قبلك، ويتشكل هلال
ويرسم نجوم وسما وأصحاب يشعل ليلهم طيران وطبول
قلبين يتوحدون وموعد وورد وبقايا عطر في شال
أو أغنية عابرة في ليل عابر أو حكاية دبك وخيول
ضحكة طفولة، وداع اثنين راحوا عن بعضهم، وقفة أطلال
على أثر من لهم في الذاكرة رسم وأثر والوقفة تطول
هذا الكلام أعرفه، هذا الشعر مابه جديد، سنين ينقال
أبي ملامح شعر ماهو شعر عادي ولا هو إحساس منقول
معقول ذاب الكلام وما بقي من نبضنا إلا أوزان وأشكال؟!
وترهل الماء وجف من القوافي اللي تورّد عشب وحقول؟!
طيب.. وإذا مرّني هذا المسا في الذاكرة، وتسوسن الفال..
بأجمل هدايا سنين المرحلة وأكثر وهجها صدق وقبول:
عبدالله الفارسي.. وينبت على غصن المسا غنوه وموال
لمة حبايب، قصايد شعر، مالا قال هذا الليل ويقول
نظرة بعيدة نوافذ مشرعة بالحلم وبتحقيق الآمال
صبح تسولف بساتينه لقطرات الندى، مشتل ومحصول
عبدالله الفارسي.. تلقاه فيما قالت الحكمة للأمثال
فيما يقول الوعي واللا وعي عن سيرته صفحات وفصول
في "وين غايب" وفي "حبيت أسلم" كل ما غيابي عنه طال
في كل "ما قل دل" من الكلام وفي رجاحة فكر وعقول
في صاحب يسولفه، يشتاق له، وبصحبته يفخر ويختال
في كل موقف تحس إنك تبي فزعات ناس وصدق وفعول
في كيف رجال يسوى في قوانين العرب ستين رجال
في ضيقة أصحاب دربه لأغدت ضيقاتهم ضحكات وحلول
عبدالله الفارسي ويسولفون حكايته أجيال لا أجيال
في سيرته كم قمر يولد وكم شمس أشرقت وأخضرت فصول
كم من سحابة تشجر في "تضاريس" الكلام، وبالثمر مال
وكم نجم يبرق ويلمع كان قبله للنظر خافت ومجهول
منين أدور كلام يليق به يرقى علوه صدق وإجلال
كيف أعتذر؟! كيف أقول إن صاحبك يا صاحبي في صمت وذهول:
هذا المساء قال كل اللي على باله، نثر حرفه ولا قال!
عن أكثرك يا رفيق المرحلة والحلم الأول: زبدة القول