لو جف نهر النيل وماتوا العطشانين
واتسمم البير وطعم السلسبيل
لو حد مد الكف يشحت بيه السلام...،
، ومال عليل العدم وتهته في انعدام الوزن مكسور الكلام
لو فرفط الممكن في فن المستحيل
قول على الدنيا السلام
يا زير عكارك عكر الميه
والذله ف القِله عتق زي العزه محنيه
يا قُله ف صينيه راشحه ف صهد عصريه
مين قلل القِله نشّف ريق مراكبيه؟!
ما بلاش تسوء الحال يا عم يا جمال عمَّال على بطَّال
إحيينا وازقينا من زادك وزوّادك
غذينا قوِّينا ضُخ الدم في عروقنا...
،.. وساعتها نقدر نقوم بالحمل والأحمال
مين حنَّى كفك يا صحرا بحفنه من طينك؟
أكبرنا سخّر صغيرنا، وكعبنا اتشقق
ودمعنا اتررق رغم إنه متحجر
صلح أمورك وشوف طلباتنا ونصلّح
إتحقق الأول وبُص وكمل الناقص...
... تلقانا قمنا وفلحنا ف خضرة الأيام
لكن ما دام صوصوت عصافير بطون جوعنا
قول على الدنيا السلام
ضغط الزمن جاب ضغط دم
ماتت كرامة كون خضع لسياد وَثَن
واتمخطر الهم جوّه الأم والأمه
ولا يدن الديك من حوصلته إلا إن شبع
، اتزفت البكر من غير مهر ولا شبكه
نزلوا الأجنه مشوهين...
... والطرحه طارحه الورد في فصول الخريف
واتململ الأسفلت واستنطق نزيف
بطن البلك اتخرمت واتزفِّت الأبيض
رَقَص الكفيف بالعصا...
... طرف عيون الصبا وْهز الكلوب طفاه
أصغر ما في الأجاويد بيعزف من قفاه
أكبر ما في المعازيم بيتنشق دماه
اتوز صاحب الفرح قال انتباه فاقوا
اتفرق الجمع قطعوا السلسله وهجُّوا
لا اتهجوا خط الإستوا ولا بحر طال بره
اتعقدوا ف بعض واتلفت قيود العُنق
واتكعبل العُمق واتخبى العَلَم في السُنْك
اتبظ عين الصوان واتكشف اللي كان مستور
بين مكفي وبين معدول
بين مجبر وبين معذور
بين هارب وبين مسجون...
... اتحرّز الحلم بين غاصب وبين مغصوب
ومادام في زمن انعدام الوزن...
كل اللي نام لم قام
همام في أمستردام
إعلام وِدِش وحرام
وكله أصبح تمام...
... قول على الدنيا السلام!!.