أشهد أني في غيابك لي سنين
ولا يطفّي نار شوقي الانتظار
نستريح من العنا أو نستكين؟
والمدى دونك غدا ليل ونهار
كنت أشوفك في عيون العالمين
صرت أشوفك في قفارٍ من غبار
تايهٍ والقلب عاف الحاضرين
ما لقيت لضيقتي غير الفرار
ضاعت الخطوات في درب الأنين
والمسافة سدّ والذكرى جدار
يا سرابٍ يرتسم للناظرين
كل ما ناديت لك صمتي استجار
كل ذكرى صارت بدرب الحنين
واستبدّ الحزن في قلبي وصار
ذِكرياتٍ تعتزي بالراحلين
والعمر يفنى بحرقتنا انصهار
يا حبيبي والمواجع في الوتين
تستبيح الصبر وتزيد انكسار
كنت أمنّي باللقا قلبٍ وعين
في رجا وصلك وفي غمرة حصار
ما لقيت إلا بقاياي الحزين
في مهب الريح ضيعني المسار
ليت وقتي يختصر درب الحنين
وأغلق أبواب الغلا خلف الستار
يا زماني ما بقالي غير "وين"؟
في زوايا الروح من شوقٍ ونار
يا رفيق العمر يا حلمٍ سجين
عود لي أو عاد كل الكون دار
ليه يا دنيا المُحب ونصف دين
ليه صار البعد في دينك شعار
ما كتبنا للجفا نصٌ مُبين
التزمت الصمت ولصمتي وقار