أنا احمد الله جاد من جوده جبال
يأمر وينهى بين كافه ونونه
والموت في طاريه مستحوذ أشكال
واحد ولو بانت صنوفه ولونه
قبله سبقني بسكتّه قوم ورجال
الموت ما خفته وسكرة منونه
منهو يخاف الموت في مسلكه مال
ما ناخ في جنبه وكلّت متونه
ما يجنبه يومه على كل بو حال
وجند الولي في حجرته ياصلونه
وأنا اتكلت بقاسم الرزق والمال
اللي عبيده بالخفا يدهلونه
سبحانه اللي خففّ حمولٍ ثقال
مجري السحاب اللي يبلّ بمزونه
راع الفضل مرهي عظيمات وجزال
وين الخلايق سارياتٍ بدونه؟
يا الله ترحم عدّ ما كيل مكيال
قلبٍ صويب ونايحاتٍ جفونه
وتدخل به الفردوس يا باسط الجال
وتمسح بلطفك من همايل عيونه
ظميان قلبي من مواريدك زلال
قلبٍ يتوق لجنتك من شجونه
فيها عوضك اللي على كيفة البال
وصدرٍ وسيع وقبلةٍ ما تخونه
وأحلام عمري يا وليّي والآمال
ونقشٍ على كفوفي مواري خشونه
في جنة الفردوس يتغير الحال
وتَطلق حلومٍ كبّلتها سجونه
وصلف النوايب كل ما مال ميّال
ويسدّد بفعلٍ ينومس ديونه
حدب الضلوع مكوّداتٍ بالأحمال
واللي عمد للخلق ما يركنونه
يا جعل يهنا أبيض الوجه والفال
ويا جعل تضحك في ختامه سنونه
ويخمّ أمّه في طوابير الآجال
وينود في كفٍ طهور وحنونه
وتذكر قصيدٍ جزل من عقبه أجيال
وتذكر علوم وصيت وتذكر فنونه
من يشهر بسيفه وللضيف مدهال
يقلط عليها لين جفّت ليونه
اقدم بكلمة حق والحق ينقال
بردٍ بقيّاظ الفلا ينشدونه
يمه تعالي دمعي اليوم سيّال
يمه ونيني فيك ما يسمعونه
يمه وصلت لقمة الياس منزال
وعقلي بلغ بالفقد أقصى جنونه
وعرقٍ صفيٍ ما به سموم وحثال
واليوم شكّت في رحيلك ظنونه
يمه أبيك اليوم والغيم همّال
يمطر نحيب اللي تكاثر حزونه
يومٍ ابتقهوى من الموت فنجال
يومي وتنطحني سناين قرونه
وتطول في عيني مراقد ومقيال
واذوق من فاسه وفاتك طعونه
يا الله عسى تظله عن القيظ بظلال
جرمٍ عجول ومنوته يدفنونه