على هونك، ترفّق بي وحسّ شويّ في مغليك
على هونك، أنا ما أقوى كثير الحبّ في صدري
أحبّك حبّ ما يوصف، ولو تفهم شعوري فيك...
أبد ما كنت تتجاهل، مسوي حيل ما تدري!
أبد ما لاحظَت عينك، عيونٍ للهوى تدعيك!
ولا قد لامسَت روحك، خواطر حولها تسري!
أنا والله سبب صمتي أخاف أن لهفتي تشقيك
وأخاف أنك تجافيني ولا ألقى جبر كسري
أحس من يوم ما شفتك وقلبي صار بين يديك
يقول بكلّ دقاته (ترى سلمت لك أمري)
أحسّ الأرض تضحك لي إلى منّه طرى طاريك
أجل وشلون لو تظهر! فرح هالكون بي يجري!
جنوني لك، لحوني لك، عيوني لك ولا تكفيك
أنا أستاهل وتستاهل وقربك هو عوض صبري
تأمِّلني، تجمِّلني، تكمِّلني وأنا شاريك
وأبي أقسم معك عمري لآخر يوم في عمري