يا صاحبي لا تحسبني ليا غبت
أغيب وتغيب المشاعر معايه
إلا بتبقى ذاخرة لك ولو شبت
دور البطولة في فصول الرواية
آجع وإذا شفتك بطيف الهوى طبت
ضدين لمت فيك داي ودواية
صحيح أنا لإشرق محياك لي ذبت
لكني أدرى نقد ناسٍ وراية
وِكِّلْت ولفك يا وليفي وشِرِّبْت
كنه على ولفك وليفي وصاية
غلاك نبت وكاسيٍ قلبي النبت
لين اصبح بعين العشاشيق آية
بغيب عنك أيام وإن جيت لك جبت
قلبٍ من كروب المقادير تايه
لو شفتني ضايق واهمهم وسربت
بعض الهموم انصت لفحوى ندايه
شرقت بصدوف الليالي وغربت
تحاذفتني لين ما لانهاية
ارقد على راحة وأصحصح على كبت
أما جبر وإلا نقلت برضايه
اطرد ورى الراحة من السبت للسبت
وارجع واغير في مسار الحكاية
أنا بشر واخطيت بالعمر واصبت
واليا خطيت ارجع واصحح خطاية
وان قاله الله لافرست وتدربت
إني لاثبت بالمراقيب راية
عرفت دربي يوم بالوقت جربت
حرثت بأرضي ثم طرت بسمايه
يا رب تقبل توبتي كل ما تبت
يا رب تجعل طاعتك مبتغايه