زهرة شعر لست الحبايب
أمي الغالية
أمي يا أحلى وأغلى الناس
بهديلك أجمل إحساس
وان أهديلك كل حياتي
مش ممكن هتوفي جمايلك
دي جمايلك دايماً ع. الراس
يبقى كفايه أقدم ورده من أشعاري
تنقل لكْ كل الإحساس
أمي حبيبتي
نفسي أضمك وتضميني زي زمان
نفسي لو ارجع طفل صغير
أرضع منك نهر حنان
نفسي أبص في عينك واقرأ..
كل كتاب كنتي كتبتيه
وأحس ف. عينك بأمان
غدر الدنيا يا أغلى الناس
خلى القلب مهوش فرحان
غدر الإنسان بالإنسان
فين يامكوا الحلوه يا أمي
فين الطهر مع العرفان؟
ومبادئ ياما شربناها
وحاجات حلوه اتعلمناها
ولا يمكن أبدا ننساها
تنفع كل زمان ومكان.
شاب الشعر وعدى العمر.
وأنا دايماً مشتاق للقاكي.
والغربة الصعبة وبلاويها
هدت كل كيان وكيان
عاوز أقوللك كلمه ف. سرك
عاوز أطوف بصوابعي يا غاليه
بجنة خدك
واقطف كل حروف أشعاري
من حرف مزهزه بشفايفك
نفسي اتمتع بالبستان
زي زمان
بس خسارة يا أغلى الناس
روحتي وغبتي
وأنا تايه من غير عنوان
عند الخالق خدتي طريقك
وسكنتي بجنة رضوان
سبتي صغار كتاكيت ف. الدنيا
ما لهومش ضوافر وسنان
ولا ليهم في الشر طريقه
ولا عرفوا طريق الطغيان
لكن كلمة حق بقولها
سبتي ولادك للرحمن
والي يكون في حماية ربه
مش ممكن أبدا يتهان