دنياك هذي ماصفت للزحازيح
لطامة العايل وساع البنايد
اللي عطاياهم كما مرسل الريح
تهل وبل المرهشات الرواعد
ولا الملوك اهل الجيوش الجحاجيح
و اهل القصور النايفات الشواهد
دنياك بين منكدات وتفاريح
ما تصفي الا في الجنان الخوالد
مير استمع مني إشارة وتصريح
تصبح ليا قالوه صايد وفايد
اختر صحيبك في الرجال المفاليح
اللي لهم في الطيب سلم وعوايد
وانقى الكلام اللي كما الورد والشيح
و خل الهروج الزاهقة والنقايد
واحذر كثيرات العتب والتمازيح
و كثر التشره زود هم وحقايد
و احذر من اللي ماخذ الخلق تشريح
نقالة القالة قلال الفوايد
و صلاة ربي غاديات ومراويح
على النبي الهادي روى كل وارد
عداد همال السحاب المجاديح
وعد البروق اللامعات الوقايد