وتضيق حتى ينخنق صدر الفضا
وتضيق حتى يشهق الصدر الرحيب
وتضيق حتى ينطفي جمر الغضى
وتضيق حتى يبرد العظم الصليب
وتضيق ثم تضيق ويحل القضا
ويستوفي الطلاب حقه من الطليب
وتغيب شمسٍ مشرقه فيما مضى
على كواكب خمس داهمها الشحيب
كواكبٍ من دونها شمس ولظى
قبل الغروب ومولد الجرح العطيب
كواكبٍ فازت من الشمس برضا
هون علاها مغرب الشمس الكئيب
شمسٍ سناها حين مغربها أضى
وجه الكواكب وانجلى الغيم المريب
ماتت ومعها مات صوت الموعظا
اللي صدح بالحق في عصره خطيب
ماتت ومعها مات قلبٍ ابيضا
ماستوطنه كره وحسد ماغير طيب
ماتت ومعها مات فرحي مجهظا
الله يعوضني فرح غيره يشيب
ماتت ومعها معبد العابد فضى
وين اللي كانت تشغله ذكر ونحيب
وين اللي كانت كل ماعزمي قضى
صاحت بي اصمل ياصبي تراك ذيب
وين اللي لآ ولى ضميري معرضا
صاحت بي ارجع ترقبك عين الرقيب
راحت وقام الحزن فيني يقرضا
قرضٍ نخر عظمي وأرداني صويب
راحت حملها كتفي لقبرٍ حظى
اعظم كرامه واحتوى شمس المغيب
راحت قبرها كفي المتعضعضا
من الكآبه ومن نواجذ هالنصيب
راحت وياربي تحرم كل عضا
جَده عن النار السعيره يا مجيب