جمعت شتاتي وجيت المطار وحالتي حاله
ابي ارميه وارميني سوى في حجرة ضلوعك
ثلاث سنين اترقب قدومك واحتري اطلاله
تعوضني سنين عجاف وتشبع جوعي وجوعك
تفرح قلب في/ غيابك محد من البشر ناله
بقى صاين لك العشره ركيتي فوقه بكوعك
تلملم ماتبعثر من كياني وتحيي آماله
برجعه تقتل الفرقا وتطمن روعي وروعك
تباشير الفرح ؤدت تجاعيد الشقى ف/جاله
محته تقول ماكنه قبل قد زار موجوعك
وصلت الصاله واللهفه لها في داخلي هاله
تفيض احساس لو يسقي جذورك طالت فروعك
وقفت انتظرك اتخيل قدومك وانتي مختاله
فرح بمعانقي حتى تبلل كتفي دموعك
وآنا من صارخ اشواقي عن عيون البشر داله
نسيت إنّا مع الناس وخرقت طبوعي وطبوعك
اضمك لين يتشكل جسدك بجسمي وأغتاله
واحبك لين ماجمري يذوب اعتل شموعك
يهدي رعشة اطرافك طواق ايدين جفاله
من احضانٍ سوى احضانك ملامح بؤسها يلوعك
اقلط صدرك لفاله ويقفى فاله عقاله
بعد ماتشربي فنجال حشمه وتقدعي قدوعك
أغادربك الى مجلس محال تهزي فنجاله
تفوح دلاله من ضوي ونوره من سنا سطوعك
وقفت وسارحٍ فكري معَ طلتك واطلاله
يراجع قصتي وياك من سبتك الى ربوعك
وعيت ادورك بين الجموع برجوى اقباله
لوجهك بينهم حتى تطمن قلب مفجوعك
ولكن للأسف قلبي تحطم وانكسر فاله
بعد ماقيدك ظرفك عن الرحله وعصى طوعك
رجعت وباقي شتاتي تبعثر مني بالصاله
امانه لو رجعتي يوم تلمينه مع رجوعك