البحر موجه يتلاطم والسما برق ورعود
والغريق فبحر مظلم يطلب الله فالنجاه
لو نجا من نار تحطب من جسد مسلم وقود
مانجا من بحر غادر كود ربي احتماه
تكره النار المياه وبينهم حالة صدود
لكن اتحدوا وصاروا كلهم ضد الحياه
يهرب من النار للما عل يلقى فيه فود
يحتضنه الماء حتى يلقى حتفه فالمياه
الله ياكبر المصيبه ويا عساها ماتعود
راحت نفوسٍ بريه حكم ربي في قضاه
غرقت العباره واخذت معها من ذيك الحشود
كم طفل كم شاب وشايب وكم أم وكم فتاه
حول الف واربعمية راكبٍ ولا يزود
صارعوا فالبحر الاحمر موت يطحنهم رحاه
ليله ذاقو فيها حر وبرد وارهاق ولهود
حر نار وبرد ماء ووضع روّع من رئاه
الهلع والخوف عم وموج فرقهم يقود
هذا يمنه وهذا يسره وكلن يجاهد بلاه
موج عاتي وبرد قارس واصل لحد الجمود
مات من شدته طفلٍ حضن امه ماوقاه
زاد ملح الما ملوحة دمع ينحت فالخدود
واختلط صوت المناحاه مع تراتيل الدعاه
الوجيه البيض صارت من جزعها شبه سود
اكتساها لون باهت الله يعلم وش وراه
ماخطر فالبال الا رهبة وضيق اللحود
منظرٍ واحد تراء في خواطرهم عناه
أغلب الألسن تردد يا إلهي يا ودود
فرج الكربه بفضلك يامجيب لمن دعاه
رهبه وموقف رهيبٍ بيحت فيه السدود
السعيد الي اتعظبه والشقي الي نساه
أخت تستنجد بأخوها وإبن يستنجد بعود
وعود مات وظهره اصبح للإبن قارب نجاه
هذا متعلق بقشه والأمل انها تجود
معه حتى ينجو لكن جاله القرش وكلاه
وهذا ينقذ فالاوادم معدنه طيب جدود
انقذ الاول والاخر جره الموج وخذاه
امتلت كل القوارب بالوقوف وبالقعود
واحدٍ يلقى مكان وثاني القارب رماه
احتروا ساعه ثلاثه اربعه خمسه ياكود
تأتي قوات الإغاثه تبدأ انقاذ النجاه
اشرقت شمس الصباح وباقي القوه رقود
كل لحظه تموت نفسٍٍ بالله ياخي من خطاه
مع دفى شمس الظهيره ابتدى بعض الجنود
في اغاثة قله ربي اصطفاهم من عطاه
استمرت بعد ذلك كل انواع الجهود
فالإغاثه والرعايه للي يوصلهم نداه
احتشد اهل الضحايا في ترقب عالحدود
يحترون لوفد ناجي او جثث ولا رفاه
فيه من قابل قريبه ناجي بباقة وروود
وفيه من قابل قريبه بكفن غطى عضاه
كل ناجي يروي قصه إلهدت منها الكبود
عن طفل مات بيد امه عن ابو فارق ضناه
عن سعد مات وذراعه مطوقه عاتق سعود
يلفظ انفاسه الاخير وسط مرأ من اخاه
حاول انقاذه سعود ولا توانى للركود
حاول وحاول وحاول ورغم هذا ما مداه
او هذاك الجوع حده انه ياكل فالنقود
مانسى فالبحر فرضه اذن وصلى الصلاه
او هذيك البسمه الي ماتت بشفة عنود
من بعد ماتوا اهلها كيف تحيا في رفاه
مات ابوها مات اخوها واختها الطفله نجود
واكتمل حجم المصيبه في وفاة الام آه
انكتب تبقى وحيده حايره في هالوجود
طفله وتحمل همومٍ دكت جبال السراه
ماسبق حاجه بسيطه من روايات الشهود
وما خفى اعظم وانا اعجز اني اوصل منتهاه
كل ناجي يحمد الله في ركوعه والسجود
والغريق الله بفضله للشهاده اصطفاه
يا الهي يا الهي يا الهي يا معبود
ادخل الغرقى جنانك يامجيب لمن دعاه