ملّيت من جلستك يالصاحب الخاص
ما دام طير المرجلة ما يطيري
العام فزعاتك مثل فزعة الشاص
واليوم فزعاتك على بلاك بيري
من بعد يضرب فيك رمزٍ للإخلاص
الحين رمزٍ للجفا يا هجيري
لولا غلاك اللي تمكّن بالاقفاص
لاقول لك فارق عسى فيه غيري
يوم اتذكّر خوّتك وقت مقناص
يهون عندي كل شيءٍ كبيري
شخصٍ يساوي في مواقيفه أشخاص
يوم إن دلوي طاح في وسط بيري
كم واحدٍ عن لازمي جنّب وحاص
والمغني الله والزمن يستديري
والطيب مثل الصيد والرجل قنّاص
وإن صاب يكسب كل خيرٍ وفيري
وإن خاب يلقى سيف عمرو بن العاص
يبتر خماله يوم شبره قصيري
والدر ما يجيبه سوى رجل غوّاص
يحسم كبير الأمر مثل الصغيري
ماني على جرّة أهل العرف قصّاص
لكن مشاريه وعتب في ضميري
ملّيت من جلستك يالصاحب الخاص
والله يقلع صانع بلاك بيري