سحابة الفرقا بها برق ضاوي
ويعيد ذكرى ماضيه من لياليه
من وين ما وجهت زوله مخاوي
يسوق نفسي للعنا والتهاتيه
وش كان عندي بالمحبّة يساوي
حرٍّ يجاوب صاحبه يوم يدعيه
واليوم في ذكراه حالي شقاوي
والشعر واساني وناحت قوافيه
كل ما مشيت بدرب حبّه فداوي
يردّني دون الوصل قوّ سافيه
ذيب الفراق بقمّة الحب عاوي
من بعد ذاق الجوع في وصل غاليه
يا ليتها بالجاه والا العزاوي
كان الأمر في كل الأحوال منهيه
بشت الحساوي ما يفيد الحساوي
لا صار عن متنه قصر ما يغطّيه
ما ينثني رجلٍ بعزّه غناوي
لو عرّضوا وجهه سموم المشاريه
ويلومني بالعشق رجّال خاوي
وجيش المودّة ما لعب في محانيه
أصارع الأيام فعل ودعاوي
مير البحر ماني على حد شاطيه
آسف على فرقاه ما عدت قاوي
درب المحبّة خطوتي عاثرة فيه
لو كنت تذكر يا بعيد الهقاوي
كم واحدٍ بالحب ضاعت هقاويه
يشبه شعوري فيه حرٍّ نداوي
شلع سما ولا التفت يمّ راعيه